Gold Export: అంతర్జాతీయంగా పెరుగుతున్న ఆర్థిక, భౌగోళిక రాజకీయ అనిశ్చితి నేపథ్యంలో నెదర్లాండ్స్ కీలక నిర్ణయం తీసుకుంది. అమెరికా, కెనడా నుంచి భారీ మొత్తంలో బంగారాన్ని తరలించి లండన్లోని బ్యాంక్ ఆఫ్ ఇంగ్లాండ్లో భద్రపరిచింది. దాదాపు 86 టన్నుల బంగారాన్ని తరలించినట్లు డచ్ సెంట్రల్ బ్యాంక్ (DNB) వెల్లడించింది. అవసరమైన సమయంలో దాన్ని అంతర్జాతీయ మార్కెట్లో వేగంగా విక్రయించడం, కొనుగోలు చేయడం లేదా తాకట్టు పెట్టడం సులభంగా ఉండటమే బంగారాన్ని లండన్కు తరలించడం వెనుక ప్రధాన కారణమని DNB తెలిపింది.
ఈ ఏడాది మార్చి నుంచి ఆగస్టు మధ్య నెదర్లాండ్స్ తన బంగారం నిల్వల్లో కొంత భాగాన్ని అమెరికా, కెనడా నుంచి తరలించింది. తొలుత దాదాపు 27 టన్నుల బంగారాన్ని అక్కడి బ్యాంకుల నుంచి నెదర్లాండ్స్కు తీసుకొచ్చారు. అనంతరం దాన్ని లండన్లోని బ్యాంక్ ఆఫ్ ఇంగ్లాండ్కు తరలించారు.మిగిలిన బంగారాన్ని న్యూయార్క్లో విక్రయించి, అదే మొత్తానికి సమానమైన బంగారాన్ని లండన్ మార్కెట్లో తిరిగి కొనుగోలు చేసినట్లు DNB వివరించింది. ఈ మొత్తం ప్రక్రియను ఒకేసారి కాకుండా.. రవాణా సమయంలో ఎదురయ్యే సమస్యలు, భద్రతా పరమైన ప్రమాదాలు, నష్టభయాలను పరిగణనలోకి తీసుకుని వివిధ దశల్లో పూర్తి చేసినట్లు డచ్ సెంట్రల్ బ్యాంక్ పేర్కొంది.
బంగారాన్ని లండన్కు తరలించిన సమయంలో అంతర్జాతీయంగా ఆర్థిక, వాణిజ్యపరమైన అనిశ్చితి కొనసాగుతోంది. ముఖ్యంగా అమెరికా, కెనడా మధ్య వాణిజ్య ఉద్రిక్తతలు, సుంకాల వివాదం ప్రపంచ మార్కెట్లపై ప్రభావం చూపుతున్నాయి. అదే సమయంలో పశ్చిమాసియాలో నెలకొన్న ఉద్రిక్త పరిస్థితులు కూడా ప్రపంచ ఆర్థిక వ్యవస్థపై ప్రభావం చూపుతున్నాయి. ఇలాంటి సమయంలో విదేశాల్లో ఉన్న బంగారం నిల్వలను మరింత సులభంగా ట్రేడ్ చేయగలిగే ప్రాంతానికి మార్చడం వ్యూహాత్మక నిర్ణయంగా భావిస్తున్నారు.
బ్యాంక్ ఆఫ్ ఇంగ్లాండ్లోనే ఎందుకు?
బంగారాన్ని లండన్లో భద్రపరచడానికి ప్రధాన కారణం అక్కడ ఉన్న ప్రపంచ స్థాయి గోల్డ్ మార్కెట్. లండన్ ప్రపంచంలోనే అతిపెద్ద బంగారం ట్రేడింగ్ కేంద్రాల్లో ఒకటి. అక్కడ బంగారాన్ని కొనుగోలు చేయడం, విక్రయించడం, తాకట్టు పెట్టడం వంటి లావాదేవీలు చాలా సులభంగా జరుగుతాయి. అంతేకాదు.. ప్రపంచంలోని అనేక దేశాల కేంద్ర బ్యాంకులు, ఆర్థిక సంస్థలు తమ బంగారం నిల్వల్లో కొంత భాగాన్ని బ్యాంక్ ఆఫ్ ఇంగ్లాండ్లోని వాల్ట్లలో భద్రపరుస్తుంటాయి.
లండన్లోని థ్రెడ్నీడిల్ స్ట్రీట్ ప్రాంతంలో ఉన్న బ్యాంక్ ఆఫ్ ఇంగ్లాండ్ వాల్ట్ ప్రపంచంలోని అత్యంత భద్రమైన బంగారం నిల్వ కేంద్రాల్లో ఒకటిగా పేరుగాంచింది. భారీ భద్రతా ప్రమాణాలతో నిర్మించిన ఈ వాల్ట్లో పెద్ద మొత్తంలో బంగారు కడ్డీలు, బార్లు నిల్వ ఉంటాయి. బాహ్య దాడులను తట్టుకునేలా నిర్మాణం ఉండటంతో పాటు, అనధికారికంగా లోపలికి ప్రవేశించడం అత్యంత కష్టమయ్యేలా భద్రతా వ్యవస్థలను ఏర్పాటు చేశారు. ఇక్కడ నిల్వ ఉన్న బంగారంలో అధిక భాగం బ్రిటన్కు చెందినది కాదు. ప్రపంచంలోని 30కి పైగా దేశాల కేంద్ర బ్యాంకులు, అంతర్జాతీయ సంస్థలు తమ బంగారాన్ని ఇక్కడ భద్రపరిచినట్లు సమాచారం.
బంగారం తరలింపు కూడా సులభమే!
బ్యాంక్ ఆఫ్ ఇంగ్లాండ్లో బంగారం నిల్వ చేయడం వల్ల మరో కీలక ప్రయోజనం ఉంది. దేశాల మధ్య బంగారం బదిలీ చేయాల్సిన సందర్భంలో ప్రతిసారీ బంగారాన్ని భౌతికంగా ఒక దేశం నుంచి మరో దేశానికి రవాణా చేయాల్సిన అవసరం ఉండదు.ఉదాహరణకు.. ఒక దేశం తన బంగారాన్ని మరో దేశానికి విక్రయించినప్పుడు, వాల్ట్లోని ఒక ఖాతా లేదా కేటాయింపులో ఉన్న బంగారాన్ని మరొక దేశం పేరుతో ఉన్న ఖాతాకు బదిలీ చేయడం ద్వారా లావాదేవీని పూర్తి చేయవచ్చు. దీంతో రవాణా ఖర్చులు, భద్రతా సమస్యలు, దొంగతనం లేదా నష్టపోయే ప్రమాదాలు గణనీయంగా తగ్గుతాయి.
నెదర్లాండ్స్ తీసుకున్న ఈ నిర్ణయం.. ప్రపంచ దేశాలు తమ బంగారం నిల్వలను కేవలం పెట్టుబడిగా కాకుండా ఆర్థిక భద్రతకు కీలకమైన ఆస్తిగా చూస్తున్నాయనే విషయాన్ని మరోసారి చర్చకు తెచ్చింది. అంతర్జాతీయ వాణిజ్య వివాదాలు, భౌగోళిక రాజకీయ ఉద్రిక్తతలు, మార్కెట్లలో అనిశ్చితి పెరిగిన సమయంలో కేంద్ర బ్యాంకులు తమ బంగారం నిల్వలను ఎక్కడ, ఎలా ఉంచాలనే అంశంపై మరింత జాగ్రత్తగా వ్యవహరిస్తున్నాయి. సంక్షోభ సమయంలో బంగారాన్ని త్వరగా ఉపయోగించుకునేలా, అంతర్జాతీయ మార్కెట్కు దగ్గరగా ఉంచాలనే వ్యూహాత్మక నిర్ణయంగా దీన్ని చూడవచ్చని ఆర్థిక నిపుణులు చెబుతున్నారు.
